ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានផ្ញើលិខិតជូនពរខួបកំណើតដល់ឧបនាយករដ្ឋមន្ត្រី ម៉ែន សំអន កោតសរសើរ និងវាយតម្លៃខ្ពស់ចំពោះលោកជំទាវ ដែលបានរួមចំណែកយ៉ាងធំធេងក្នុង បុព្វហេតុបម្រើប្រទេសជាតិ។

ក្នុងលិខិតជូនពរនោះសម្ដេចតេជោ ហ៊ុន សែន បានលើកឡើងថា លោកស្រី ម៉ែន សំអន ជាថ្នាក់ដឹកនាំមួយរូបពោរពេញទៅដោយគុណធម៌ និងគំរូវីរភាពដ៏ប្រពៃ ហើយតែងតែខិតខំប្រឹងប្រែងលើកស្ទួយសិទ្ធិនារី ការពារអត្តសញ្ញាណជាតិ ប្រពៃណី ទំនៀមទំលាប់ និងវប្បធម៌ដ៏ល្អផូរផង់ និងបានចូលរួមគ្រប់សកម្មភាពក្នុងទិសដៅបម្រើឧត្តមប្រយោជន៍ជាតិ និងសុខុមាលភាព ប្រជាជន។

ឧបនាយករដ្ឋមន្ត្រី ម៉ែន សំអន កើតនៅថ្ងៃទី១៦ ខែសីហា ឆ្នាំ១៩៥៣ នៅក្នុងស្រុកសំបូរខេត្តក្រចេះ បច្ចុប្បន្នលោកស្រីគឺជាអនុប្រធានគណបក្សប្រជាជន និងជារដ្ឋមន្ត្រីក្រសួងទំនាក់ទំនងព្រឹទ្ធសភារដ្ឋសភាកម្ពុជា។ លោកស្រីត្រូវបានគេចាត់ទុកថាជាស្ត្រីម្នាក់ដែលមានឥទ្ធិពលនៅក្នុងសង្គម និងជាតែស្ត្រីតែម្នាក់គត់ដែលមានឋានៈជាឧបនាយករដ្ឋមន្ត្រី ដែលជាតំណែងកំពូលមួយនៃរាជរដ្ឋាភិបាល៕